Повеќето луѓе кога ќе слушнат рак веднаш креваат раце и мислат на најлошото, веќе те прежалуваат без да бидат свесни дека не е таа реакцијата што секој болен сака и треба да ја види – вели 30-годишната Симона Маџарова од Стојаково во интервју за порталот „Умно“ за својата средба со дијагнозата канцер.
„Денот кога почна да ми опаѓа косата, со моите другарки отидовме да избереме перика, и тој момент го направивме забавен. Не и’ придававме многу значење на косата, зашто коса е само коса, ќе порасне, тоа не е ни битно, колку што е важно да си здрав, да имаш волја и сила во срцето и да не се откажуваш никогаш“ – вели Симона, девојка од гевгелиското село Стојаково. Во животот ни’ се случуваат многу работи што не прават силни, за жал, понекогаш и такви што ниту на друг не ги посакуваме, а камоли на себе.
Пред две години (интервјуто е реализирано 2021 година, н.з.) на Симона и’ бил дијагностициран рак на дојка. Но, таа не дозволила таа вест да ја совлада. Храбра и сигурна во себе, Симона најмногу се грижела како да сподели со својата фамилија што и’ се случува. Таа зборува отворено за болеста и ги охрабрува сите девојки да не се затвораат во маката и да ја споделуваат со другите.
– „Во тој момент ни треба некој да верува во нас, да верува дека ќе се излечиме, дека силни ќе поминеме низ тој долг и тежок период. Не ни треба сожалување и солзи. Моите и сите што беа околу мене веруваа во мене, веруваа дека ќе се излечам и дека ова е само период што ќе помине. Мајка ми, татко ми и сестра ми се најсилните луѓе што ги знам и од кои учам цел живот. Токму заради нив од ден на ден бев сè посилна, на сите предизвици со храброст им пристапував и знаев дека ќе успеам, тие ми се ветар во грбот, секогаш туркајќи ме напред“ – вели Симона.
Оваа храбра девојка и покрај операцијата на 26 мај 2021 година, на денот на нејзиноот 29-ти роденден, во ковид услови, денеска ја загуби битката со канцерот. Во нејзин спомен и важноста за навремено дијагностицирање на ракот на дојка го споделуваме нејзиното интервју за порталот „Умно.мк“ рализирано во октомври 2021 година по повод „Октомври е месец за свесност за рак на дојка“.
Ракот на дојка на светско ниво е најчест вид рак, а исто и во Македонија. Околу 2,3 милиони нови случаи на рак на дојка биле дијагностицирани 2022 година, што претставува 11,7% од сите случаи на рак, вели СЗО. Кај жените, ракот на дојка е најчесто дијагностициран карцином и водечка причина за смрт од рак ширум светот.
Целото интервју од порталот „Умно.мк“ е на овој ЛИНК
Автор: Сребра Ѓорѓијевска
Фото: Фејсбук – Симона Маџарова – Згасна животот во овие сини очи, во оваа младост, во оваа убавина
На 14 септември, четири месеци после операцијата, Симона на својот фејсбук прифил постирала фотографија со кратка коса, со нејзината магична насмевка, со топлите очи и своето куче, па ја напишала пораката: „Keep a place for me in heaven, my angel 💔“, во превод: „Чувај ми место во рајот, ангелу мој 💔“
Светол ти пат Симона!
Придружи им се на ангелите во светлите предели на вечниот спокој!
