Од сабота (04.03) граѓаните ќе можат да купат леб до 33 денари во сите продавници.
Групацијата на мелничко-пекарската индустрија соопшти дека по тридневниот застој, ќе продолжи со испорачување на бел и полубел леб за граѓаните, по замрзната цена. Бидејќи тврдат дека трпат огромни загуби изминатиот период, најавија дека битката ќе ја продолжат на суд, каде што ќе бараат обесштетување од државата.
Одлуката, по состонакот што се одржа во Стопанскатаа комора, ја соопшти Горан Малишиќ, претседател на Групацијата на мелничко пекарската индустрија, кој најави дека не се исклучува можноста да бидат принудени да го намалат бројот на вработени за да опстанат.
Пекарите не прецизираат колку пари им се потребни за производство на еден леб, а за пресметките на Владата велат дека никој не може да даде унифицирана цена на производство.
– „Пекарниците се согласија од утре да се почне со производство и испорака на одредени видови леб, во зависност од секој од можностите за да може да им се излезе во пресрет, пред се на потрошувачите, но и да се опстане во периодов на погрешни одлуки, кои нанесуваат штета со несогледливи последици за нас како индустрија“ – порача Малишиќ.
Од групацијата сметаат дека владините одлуки се спротивни на уставот и законите и ним ќе им предизвикаат значителни загуби, кои до 31 мај, би достигнале 4,5 милиони евра.
Од мелничко пекарската индустрија не дадоа ниту конкретен одговор на прашањето како е возможно производител од Штип да може да го продава лебот по 33 денари, а на пекар од Скопје ова да не му исплатливо. Оттаму не прецизираа ниту колкумина од пекарите деновиве го бојкотираа производството на белиот и полубел леб, а не доставуваа ниту било каков друг леб до продавниците и маркетите.
