Црквата „Апостол Павле“ во градот Катерини во Грција по осми пат и оваа година го организираше спортскиот настан – трка „Патот на Апостол Павле“, траса долга 10 километри.
Се трчаше во прекрасна природа, низ расцветани патишта со леандри, а сите жители на двете села низ кои минува тркачката траса, од најмладите до највозрасните, ги бодреа учесниците.
Организатор на настанот е Црквата во Катерини и Атлетскиот клуб „Зевс“ од Катерини.
Гевгелискиот атлетски клуб „7 Ноември“ учествуваше на спортскиот настан со 5 претставника и сите успешно ја завршија трката. Немавме претставник на подиумот, но затоа имаше спортски дух, пријателства, насмевки. Нашите атлетичари ги поздрави и пречека Митрополитот во Катерини.
Гевгелиската атлетска дружина ја сочинуваа: Дарко Прошев, Борче Узунов, Никола Нанчев, Никола Ковачев и Драган Ристов.
За спортскиот пиетет на нашите гевгелиски атлетичари и учеството на трката ќе додадеме за важноста на апостол Павле за Македонија:
Апостол Павле по прифаќањето на христијанството станал првиот проповедник на новото месијанско учење при своите мисионерски патувања.
Своето прво патување надвор од Азија, апостол Павле го направил во Македонија. Тоа започнало во 51 година, а завршило во 54 година, при што во текот на тие години тој посетил и некои грчки градови, каде што, исто така, биле основани христијански црковни општини за што сведочат и „Делата на светите апостоли“. Мисијата му била насочена кон христијанизацијата на народот на овие простори.
Апостол Павле, чиј спомен го чествува Македонската Православна Црква е една од најзначајните личности за христијанизацијата на Македонија, а потоа и на целиот овој регион, а подоцна и на Европа.
Честитки за спортскиот настап на гевгелиските атлетичари и претставувањето на спортска Гевгелија и на ова топло време на тркачките патеки во соседна Грција!
