Синоќа во изложбениот салон на Амамот во Гевгелија беше отворена изложбата на гевгелискиот уметник на фотографијата и регистратор на амбиентот во Гевгелија и гевгелиското опкружување, Димитар Новаков.
Познат по својот сенс за кадар, со своето уметничко око да го долови моментот на природниот распоред на урбаните градби во допир со природата, или природните моменти на експлозивна убавина, Димитар Новаков овој пат се одлучил да подготви изложба со доловените убавини на Кожуф планина. Кожув во залез, кожуф во сина прегратка, Кожуф во боите на облаците, и други… тоа се лицата на планинската убавица која Новаков ја портретира во над 30-на фотографски експонати во галеријата Амам.
Изложбата привлече дел од уметничката публика кај нас. Заедно со каталогот на изложбата посетителите можеа да ги бираат фотографиите фаворити за најдобри експонати, или да одберат нешто да понесат дома.
Новаков не изложува прв пат. Знаеше приказната за Гевгелија да ја доловува низ крововите, оџаците и да стави посебна приказна за топлината на нашиот град.
Тој е уметник со интерес и за други уметнички правци во друштво со објективот. Член е на групата „Диверзија“ која ја засмева Гевгелија, па и Македонија, дури и со меѓународни гостувања со скечеви од гевгелиското, или нашето општествено однесување. Овде има улога на камерман и коавтор на сценарија.
Со ваков уметнички багаж зад себе вака се прави едно „Селфи на успехот“.
Изложбата ја организира Национална установа Музеј Гевгелија, а се реализира со поддршка на и Министерството за култура и туризам на Република Македонија.
