Популарното диско „Банго“ во Гевгелија функционираше некаде во 80-те години од минатиот век се до опожарувањето на зградата каде што беше лоциран, а тоа беа поранешните административни и магацински простории на ЗИК „Винојуг“ Гевгелија.
Објектот се наоѓаше позади сегашната зграда на Поштата во Гевгелија.
беше собиралиште на млади, ноќни диско забави, дружења, пријателства, први љубови. Овде доаѓаа на забава млади од регионот, од Кавадарци, Неготино, Струмица, па и од Скопје.
Пред да замре диско ерата во Гевгелија замре ова диско поради заминувањето на „Винојуг“ во стечај и немањето можност просторот да се санира и повторно да заживее.
Деновиве на теренот на некогашното диско присутна е градежна механизација, а просторот е градежно активен. Се гради нова станбено-деловна зграда „City park“ со приземје и шест ката. Инвеститор, проектант и изведувач на работите е локалната фирма „Алфа-Проект“. На ѕидовите од некогашното диско стојат испишани графити, а во внатрешноста стојат рекламни написи, останати сеќавања од едно време.
Гевгеличани во „Банго“ потонуваа во атмосферата од филмот “Saturday Night Fever” со стаклената кугла на сред диското која ја маѓепсуваше целата внатрешност, имаше современо озвучување, сапареа со ТВ во боја кои емитуваа спотови од музиката која одеше во етер, платформа за играње и едно чудо натиснати млади луѓе. Ќе влезеш испеглан, ќе излезеш згужван, се’ беше телот до тело кои се нишаа во ритамот на музиката.
Ова се сеќавања на генерациите од 50-те, 60-те па и 70-те години кои овде ги минувале првите журки со друштво. Сегашните минувачи покрај овој простор гледаат само ограден плац и иден куп железо, профили, механизација и камиони. Кога ќе никне зградата ќе речат што убаво заличи просторот без зачадените ѕидови кои зјаеја празни со искршени прозорци. Времињата се менуваат, барем убавите спомени да остануваат, а убавите работи нека се редат и понатаму во животот.
