Долгогодишен спортист и учесник на атлетските повеќебои во државата за лица со инвалидитет, Никола Пеев од Стојаково, успеа да освои подиум за ВТОРО место на меѓународниот атлетски митинг што се одржа викендов во Крушевац, Србија.
Никола второто место го освои во дисциплината „фрлање диск“, споени класи Ф13/36/38/40/41/46/63 и во конкуренција на пет натпреварувачи го фрли дискот на далечина од 22,18 метри кои му донесоа 186 поени. Второто и третото место ги освоија натпреварувачи пара атлетичари од Србија.
Друг забележителен резултат на шестчлениот пара атлетски тим од Македонија на атлетскиот митинг во Србија гопостигна натпреварувачката Елена Давитковска. Таа е со Ф56 и настапи во дисциплината „фрлање диск“ Ф55/56 и го освои третото место во конкуренција на четири натпреварувачки, со резултат од 12,23 метри или 280 поени.
Третиот успешен настап го имаше Тамара Гошева од Валандово која постигна личен рекорд на терените во дисциплината „фрлање диск“. Тамара Гошева (Ф46), својот личен рекорд го позиционираше на 19.61 метар или 283 поени, меѓутоа таа беше единствена жена која настапи во тие категории, немаше со кого да се споредува во резултатот и не оствари пласман.
Никола и Тамара се членови на ЗГ „Мобилност“ Гевгелија и носители на медали на Државното првенство во атлетика за инвалиди 2025, но носители на медали се и од 2024, 2023…. Како најуспешни во атлеткски повеќебој меѓу пара атлетичарите во Македонија на покана од селекторот Крсто Серафимовски станаа дел од македонскиот пара атлетски тим кој учествуваше на атлетскиот митинг “Отворено првенство на Србија во пара атлетика 2025”, што се одржа на 19-20.07.2025 година во Крушевац, во организација на Параолимпискиот комитет на Србија.
Во Македонскиот тим учествуваа: Елена Давитковска – класа Ф56, Тамара Гошева – класа Ф46, Никола Пеев – класа Ф36 и Зоран Јовановски – класа Ф55.
Нашите спортисти настапија во по 3 фрлачки дисциплини (копје, ѓуле и диск).
Меѓународниот карактер на митингот го потврди учеството на екипи пара атлетичари спортисти од: Србија, Црна Гора, Босна и Херцеговина, Северна Македонија, Грција, Италија и Индија.
Во останатите дисциплини постигнати се овие резултати:
– Елена Давитковска настапи првиот ден и во дисциплината Копје Ф54/55/56 каде го освои петтото место од пет натпреварувачки со резултат од 9,05 метри;
– Зоран Јовановски Ф55 настапи во дисциплината Копје Ф34/54/55/57 и со резултат од 13,71 метри или 172 поени го освои петтото место од десет натпреварувачи;
– Никола Пеев Ф36, во дисциплината Копје Ф11/12/13/36/63, со резултат од 25,09 метри или 307 поени го освои четвртото место:
– Во истата дисциплина Тамара Гошева Ф46 постигна резултат од 17,84 метри или 12 поени и повторно како единствен женски натпреварувач во тие класи не оствари пласман;
– Никола Пеев Ф36 потоа настапи и во дисциплината Ѓуле Ф11/12/36/40/41/63 во која со резултат од 7,92 метри или 78 поени го освои петото место од осум натпреварувачи;
– Тамара Гошева Ф46, во истата дисциплина постигна резултат од 6.52 метри или 229 поени;
– Зоран Јовановски Ф55 во дисциплината Ѓуле Ф32/34/55/57 со резултат од 6.86 метри или 262 поени го освои четвртото место од пет натпреварувачи, додека во дисциплината Диск Ф51/54/55/57 со резултат од 14,99 метри или 103 поени го освои седмото место од осум натпреварувачи;
– Елена Давитковска Ф56 настапи во дисциплината Ѓуле Ф54/55/56 и со резултат од 4,59 метри се пласира на петтото место од пет натпреварувачки.
Честитки за одличниот настап на македонските пара атлетичари на меѓународниот атлетски митинг во Србија!
