Силните налети на ветер во Гевгелија синоќа предизвика штети – одлета кровот од Средното општинско училиште „Јосиф Јосифовски“, паднаа дрвја на локалитетот Топлик и искршија куќичка за одмор.
Штетата е пријавена уште синоќа од случајни минувачи кои регистрираа паднати панели за кров со лимени олуци на земјата од паркиралиштето кај Спортската сала „26 Април“. Бидејќи тоа е простор во соседството заклучокот е дека панелите од ветрот не само што се одделиле од кровот на средното училиште, туку и летале на ветрот паѓајќи на земја после неколку 10-ци метри прелет во просторот.
Пријавата за штета е примена преку Единствениот број за итни повици 112 со опис дека поради силен ветер летнала лимената конструкција од кровот на СОУ „Јосиф Јосифовски“ во Гевгелија.
Според информациите, нема повредени лица. Побарана е интервенција од службени лица од МВР, како и од надлежните институции.
За настанот се известени ТППЕ Гевгелија, ЕЛС Гевгелија и ПС Гевгелија, кои ќе преземат понатамошни мерки согласно своите надлежности.
Од терен известуваат и локални жители дека штети има и во локалитетот Топлик и на излетничкото место Динќут.
Кај Топлик паднаа гранки и стебла на стари јавори кои кршејќи се на ветрот се струполија врз новите куќички за одмор и смачкаа една таква градба на земја.
На локалитетот Динќут падна старо борово дрво, штети на околниот урбанизиран простор нема.
Вака излгледаше синоќа градот Гевгелија под налетот на ветрот кој дуваше со брзина од 43 километри на час и налет на вертовити удари над 85 km/h. Ноќта температурата иако изнесуваше 7 степени над нулата поради студениот северен ветер се чувствуваше како да е 1 степен Целзиусов. Тоа ги испразни улиците во Гевгелија пред маркетите да завршат со своето работно време.
