Гевгелискиот шампион по рецитаторство и минатогодишен шампион на поетските „Детски Рацинови средби“, до вчерашен државен вицешампион по рецитаторство, Костадин Узунов, годинава ја потврди својата Вицешампионска титула на Државниот рецитаторски натпревар кој се одржа во саботата, на 16.05.2026 година.во Скопје.
Костадин е ученик од II година при СОУ „Јосиф Јосифовски“ Гевгелија и рецитаторството го негува и со радост настапува на натпревари, под менторство на професорката Бисерка Макревска.
Тој на вчерашниот национален предизвик освои ВТОРО место на рецитаторскиот натпревар „Ацо Шопов“ во конкуренција на 26 рецитатори, средношколци од средните училишта во државата.
На натпреварот настапија и учениците Јован Грозданов и Елена Анчева од СОУ “Јосиф Јосифовски” – Гевгелија и постигнаа солидни резултати, со што добија Благодарници од организаторот.
Две ВТОРИ места истиот ден освоија и средношколките Мила Петрова и Мелита Бурмузоска кои на Државниот натпревар по класични јазици се натпреваруваа во категорија-здравствена струка.
Конкуренцијата им беше јака, помеѓу 73 ученици од 15 средни училишта од државата.
Ментор на гевгелиските средношколки е професорката Мирјана Чамџиќ, од СОУ „Јосиф Јосифовски“ Гевгелија.
Натпреварот се одржа на Филозофскиот факултет при УКИМ.
Со освоеното второ место Мила и Мелита се пласираа за учество на Меѓународниот натпревар „ELEX! Per aspera ad astra!“
Честитки за сите ученици, посебно за наградените!
