Министерството за внатрешни работи објави детали за вчерашната сообраќајна несреќа на патот Гевгелија Богданци кога се преврте цистерна, а истечената нафта се запали и настана голем пожар. Во извештајот на МВР стои нотирано дека:
– „На 25.09.2025 во 11:20 часот во ОВР Гевгелија е пријавено дека на регионалниот пат Богданци–Гевгелија, на место викано „Шарен мост“, товарно возило „Ман“ (цистерна) со полуприколка со винички регистарски ознаки, управувано од Љ.В.(42) од с.Јосифово, валандовско, се превртело на патот, а приколката се запалила. Во несреќата со тешки телесни повреди се здобил возачот Љ.В., констатирани во Општата болница Гевгелија. Извршен е увид.“
Први на терен пристигнале пожарникарите на ТППЕ Гевгелија кои примиле дојава за пожарот во 11:15 часот и се упатиле да интервенираат со едно противпожарно возило и тројца пожарникари.
Пожарникарите го извлекоа возачот заглавен во кабината од превртената цистерна, додека истечената нафта од цистерната во каналот од патот почнала да гори. Напоредно веднаш се започнала акција за гаснење на пожарот со пена. Поради споецифичниот и голем пожар кој настана од горењето на нафтата, била повикана помош од нови две противпожарни возила, а на терен напоредно интервенирале 5 пожарникари.
– „За да не ескалира состојбата со нафтата пожарникарите напоредно вршеа посипување на нафтата со земја за да се прекине горењето. Нафтата течеше од цистерната долу низ каналот од патот, па пожарникарите само го прекинаа огнениот пат да не продолжи да се шири“ – изјави Игор Ризов, командир на ТППЕ Гевгелија.
Целата акција траеше заедно со увидот на МВР до 20:45 часот. На лице место дојде и сопственикот на цистерната, фирмата „Дади компани“ од Виница кои со своја опрема ја исшмукаа целата преостаната нафта од цистерната и онаа која беше во каналот крај патот за да се отстрани понатамошна опасност од ново опожарување на местото на несреќата. Сообраќајот беше пуштен во употреба.
За ова време возачот Љ.В.(42) од с.Јосифово, валандовско беше примен во хируршкото одделение во Општа Болница Гевгелија каде му била укажана лекарска помош. Дежурниот лекар констатирал фрактура (скршеница) на клучната коска. Повреденот бил во свесна состојба, но со алкохол во крвта. Истиот е имобилизиран и пратен на домашно лекување, – изјавија од гевгелиската болница.
Денеска, 26 септември од 09:15 до 11:35 часот сообраќајот на патниот правец Гевгелија-Богданци повторно беше во прекин поради кревање на превртената цистерна која фирмата сопственик „Дади Компани“ дојде да ја отстрани од патот, да си го земе своето возило.
Екипи на ТППЕ Гевгелија повторно беа на терен со цел да се интервенира да не дојде до ново опожарување од цистерната која беше крената со механизација и однесена од сопственикот.
Епилог: возачот е безбедно збринет дома, штетата можеби е голема, патот отворен за сообраќај. Се чекаат детали од увидот на ОВР Гевгелија во сообраќајната несреќа, што е причина за истата, дали механиката, или состојбата на возачот.
