Во неделата во Гевгелија се одржа 4-от Интернационален шаховски меморијал „Венци Попов“ и на истиот настапија 135 шахисти од Македонија, Србија, Бугарија, Грција, Албанија, Германија, Данска и Косово.
По одиграните 9 кола најуспешен во севкупна конкуренција беше Ндерим Сарачи, интернационален шаховски мајстор од Косово. Тој од организаторот доби признание и парична награда од 25.000 денари.
Наградата за победникот, Победничкиот пахар и признанието ги додели синот на именосецот на турнирот Венци Попов, неговиот трет потомок Марјан Попов.
Второто место му припадна на Филип Панчевски, македонски интернационален шаховски мајстор, кој се здоби со признание за пласманот и парична награда од 20.000 денари.
Третото место повторно го завзеде македонски шаховски интернационален мајстор, тоа беше Никола Николовски кој освен признанието се здоби и со парична награда од 17.000 денари.
Организатор на турнирот е семејството на Венци Попов во соработка со Шаховскиот клуб „7 Ноември“ од Гевгелија. Тие на секој турнир посветуваат внимание на гевгелиските учесници и нивното достигнување во конкуренција со шахисти и интернационални мајстори кои се учесници на турнирот, но и на младите категории шахисти.
Така, оваа година се истакнаа:
– Борче Танчев – доби награда за најдобро пласиран гевгелиски шахист;
– Неделковски Андреј – награда за најдобар млад играч до 18 години
– Стошевски Илија – најдобар играч над 65 години, и
– Сиску Евангелија од Република Грција – најдобра шахистка.
Успехот на турнирот годинава се гледа со зголемениот број на учесници од минатата година, зголемениот број на држави кои се пријавија и учествуваа на Шаховскиот меморијал и интернационалното шаховско искуство кое се сподели на шаховските табли додека се одиграа деветте натпреварувачки кола.
Се’ на се’ успешен турнир и место на Европската шаховска мапа за Меморијалот „Венци Попов“ од Гевгелија.
