Со свечен целовечерен концерт пред својата домашна публика, викендов КУД „Негорци“ од Негорци го одбележа својот четврт вековен јубилеј, 25 години фолкорно творештво, чување на македонскиот битовен музучки код и претставување на најстарите културни традиции од југот на Македонија.
Концертот се одржа во салата на Домот на културата во Негорци, пред многу бројната публика и претставници од локалната самоуправа во Гевгелија.
Зачукаа тапаните, се развиорија ората, се пролејаа песни од младите грла, се исполни салата со задоволство и радост. Таква е мисијата на македонскиот фолклор да допре до секое срце со чувство на самобитност, исполнетост и чувство на нераскинливо опстојување.
Водечката палка на концертот со својот тапан ја имаше оснивачот на ЗКУД „Негорци“ главен оркестар мајстор и кореограф на настапите на играорците, Ѓорги Јованов.
Вечер за паметење, со насмевките на играорците и разиграните изведби на сцената.
На концертот имаше и фолклористи-гости со свои настапи како честитки до јубилејните славеници, ФА „Традиција“ од Трстеник, КУД „Браќа Толеви“ од Прдејци, КУД „Бранд Петрушев“ од Богданци и Фолклорна секција Богородица.
На настапот беа доделени и благодарници за многуте соработници на КУД „Негорци“ за посветени повеќегодишни членови, за КУД со кои разменуваат активности, посети и концертни настапи.
КУД „Негорци“ е дел од културниот растеж на с.Негорци, од основањето во 2000 година до денеска во него своите почетоци и запознавања со фолклорот имале многу генерации млади, како што покажуваат новите мали членови, оставајќи никулци за нови следбеници на нивната работа.
Да Ви се множат успесите, турнеите, презентацијата на македонскиот фолклор и на гевгелиските културни вредности уште многу години!
Уште многу јубилеи за Вас славениците од КУД „Негорци“!
