Денеска напладне на пригоден собир во организација на локалиот портал GevgeijaNet беа доделени ПЛАКЕТИ за НАЈДОБРИТЕ СПОРТИСТИ, клубови и поединци од Гевгелија и југот на Македонија. Изборот го изврши Спортската редакција на GevgelijaNET сумирајќи ги постигнатите резултати на спортистите од Гевгелија и југот по однос на нивните спортски достигнувања во текот на изминатата 2025 година во повеќе спортски и возрасни категории.
Наградите ги додели Јованка Дојранлиева, главен уредник на GevgeijaNet, а ги понесоа следните спортисти:
1. ДИМИТАР МАЏУНКОВ – Спортист на годината за 2025 – ДРЖАВEН ШАМПИОН во мотокрос во класата МХ од Генералниот пласман на Мото Крос трките од Македонскиот шампионат за 2025 година.
2. ВЛАТКО СЕМЕНАКОВ – Најдобар спортист во категорија 40+ за 2025 година – ВИЦЕШАМПИОН на Балканско првенство во атлетика одржано во Вараждин, Хрватска, член на штафетниот победнички тим на Скопскиот Маратон 2025, освојувач на атлетски подиуми во Македонија, Гевгелија, Грција.
3. ВАЛЕНТИНА УЗУНОВА – Спортска репрезентативка – прва жена од Југот на Светското првенство во планинарско трчање „Masters Skyrunning World Champs“. Првата спортистка по планинарско трчање од Богданци, член на ЗПСК „Кожуф“ Гевгелија, стана дел од репрезентацијата на Македонија во Skyrunning и овде го освои високото трето место.
4. ЈОВАН НАСЕВ – Спортско откритие за 2025 година – млад талентиран 8 годишен фудбалер, носител на 12 трофеи за МВП на одиграни 12 турнири во „Детската лига“ во Грција;
5. Спортскиот клуб за слепи и слабовидни лица „АУРОРА“ од Гевгелија – Спортски новитет за 2025 година, за организирањето на првиот турнир во „Goalball” во Македонија, во Гевгелија.
6. АНА БЕГОВА – Спортски талент во подем од девојчињата – Иднината на македонската атлетика
Таа со своите 11 години рамо до рамо со спортските сениори, атлети и ветерани истрча 8-мо време на „Скопскиот маратон“ на трката од 5 километри, претркувајќи 4600-ни повозрасни и поискусни спортисти од неа.
7. АНТОНИО КАРАКАБАКОВ – Младински спортски талент во подем – ДРЖАВЕН ПРВАК на 800 и 1.500 метри, ученик од Стојаково, поранешен член на АК „7 Ноември“ Гевгелија, сегашен член на АК „Аеродром“ од Скопје и надеж на македонската атлетика.
8. НИКОЛА ПЕЕВ – Најдобриот пара-атлетичар во Македонија, член на Македонскиот параолимписки тим, кој освои две медали (златна и бронзена) на последно одржаниот Меѓународен пара-атлетски митинг „Загреб Опен 2025“ одржан во Хрватска.
Никола е првак и вицешампион 9 години по ред во атлетски повеќебој на Републичките спортски игри за лица со телесен инвалидитет, член е на ЗГЛИ „Мобилност“ Гевгелија.
9. ШКОЛА ЗА АТЛЕТИКА на АК „7 Ноември“ Гевгелија – Најдобра Спортска школа за 2025 – раководена од спортските работници, професори, и самите спортисти Влатко Семенаков и Тоше Анчев, за бројните подиуми и трофеи што ги освојуват учениците на школата на натпревари во Македонија, Грција, Србија и Балканот.
10. ЈОВАН МАНДАЛОВ – Најмалиот спортски планинар – 7 годишниот, член на ЗПСК “Кожуф” Гевгелија за искачените сите врвови на гевгелиската планинска убавица Кожуф и 4 врвови над 2000 метри во Македонија. Гордост му е искачувањето на Кораб, највисокиот врв во Македонија (2.764 мнв).
Порталот GevgeijaNet изборот на „Спортист на годината“ го организираше и минатата година, го прошири по опсег оваа година и најавува традиционално одбележување на најдобрите спортски резултати и успеси на поединци и клубови со цел тие да бидат видливи и препознатливи по своето спортско остварување, како во својата средина, така и за пошироката публика која го следи спортот.
Порталот GevgeijaNet.com им честита за наградата на сите добитници на ПЛАКЕТА „Спортист на годината за 2025“ во својата категорија, искажувајќи задоволство што на овој симболичен прием ја собра на едно место спортската елита на Гевгелија за 2025, оние кои што се искачуваат на подиумите за победници, шампиони и вицешампиони бранеји ги боите на својот клуб, на Гевгелија, на Македонија, во надеж дека нивната упорност, дисциплина и спортски дух ќе биде инспирација за нови генерации спортисти и победници, за здрави млади и успешни поколенија.
Помагатели на настанот се „Жито-Пром“ Гевгелија и компанијата „БИСТРО Груп“ од Гевгелија.
