Второодделенец, учесник на Интернационалниот музички натпревар во две категории, на два инструмента освои ДВЕ ПРВИ МЕСТА во силна меѓународна конкуренција – Димитар Трајков од Гевгелија.
Димитар има 8 години и е ученик во II одделение при ООУ „Крсте Мисирков“ од Гевгелија, а од својата 5-та година ја посетува „Школата за тапани“ која функционира во Пионерскиот дом Гевгелија под менторство на Момчило Делев. Мал, бестрашен пред предизвикот на големите тапани, широки и масивни, ги скроти со својата умешност и чувство да создава музика. Како талентиран почетник ги имаше своите први настапи на јавни концерти пред гевгеличани, на манифестацијата „Вкуси го југот“, по повод Детската недела во рамките на активностите на Пионерскиот дом и др.
По три години учење техника на удари по тапаните, тренирање со менторот М.Делев викендов Димитар за прв пат настапи на натпревар, и тоа не од мал формат, туку Интернационален музички натпревар на кој учествуваа деца музичари од 13 земји. Меѓу сите нив и Димитар. Но, талентот е талент и сам се издвојува. Така Димитар „ги растури“ тапаните со своите одбраните нумери: 1. Metallica-„Enter Sandman“ и 2. Nirvana-„In Bloom“.
Слушнете го малиот првонаграден рокер на тапани со освоени со 96,5 поени од стручното жири:
На истиот Интернационален натпревар по музика за деца „Сергеј Михајлов“ што се одржа по 6-ти пат во Штип, малиот Димитар настапи и во конкуренција со пијано изведби во неговата категорија 2017-2018 год и освои ПРВА награда од жирито со 93 поени. Ментор наставник по пијано му е проф. Александар Лазаров.
Пред публиката и жирито ги изведе делата: 1.„Контраданца“, 2.„Караван“ и 3.„Буги“. Повелете, слушнете го пијано првакот од Гевгелија:
Димитар учи 3 години тапани, а втора година како изучува пијано, но музицира со пијаното само четири месеци, зошто првата година во ОМУ „Васо Карајанов“ изучуваше солфеж. Ужива и во двата инструмента истовремено и да го прашате кој инструмент повеќе го сака ќе ви каже „И двата!“ 😀. Ептен е музикален. Затоа е и посебен, и забележан, и награден, и со освоени награди и Дипломи се враќа во Гевгелија.
Ученикот од Гевгелија, второодделенецот Димитар, беше единствен учесник на ИН во Штип со настап во две категории, на два различни инструмента, и во двете категории однесе ПОБЕДА!
БРАВО Димитар!
