Со максимални 75 поени при националната селекција на македонски кандидати за Меѓународната економска Олимпијада за 2026 што ќе се држи во Кина, Стефан Младеновски, средношколец од Гевгелија освои ПРВО место и со тоа стана предводник на Македонскиот економски олимписки тим.
Стефан инаку е двократен државен првак по економија за 2025 и 2026 година. На одржаната селекција меѓу најдобрите средношколци од Македонија на тема економија тој го покажа своето доминантно знаење и освои ПРВО место и златен медал, со што се пласира во тимот кој ќе ја претставува Македонија на Меѓународната економска олимпијада (IEO 2026), која ќе се одржи од 12 до 20 јули во Кина.
Тој е ученик во СОУ „Јосиф Јосифовски“ Гевгелија, трета година, а за натпреварот се пдготвуваше под менторство на професорката Јасмина Костова-Папалазова.
Стефан го зачува местото н врвот – „НАЈДОБАР по ЕКОНОМИЈА“ меѓу средношколците во Македонија Тој и минатата 2025 година на Националната економска Олимпијада освои максимален број поени и се пласираше за учество во Националниот тим на Меѓународната Економска Олимпијада во Атина, Република Грција.
Меѓународната економска олимпијада (IEO) е престижен натпревар за средношколци од целиот свет во областите економија, финансии и бизнис. На олимпијадата учествуваат национални тимови од повеќе од 70 држави, а натпреварот опфаќа индивидуален тест од економија и финансии, задачи со реални економски проблеми и тимски бизнис случај (business case). Организацијата е со седиште во Берн, Швајцарија, а нејзиниот советодавен одбор го сочинуваат врвни имиња, меѓу кои и нобеловците Eric Stark Maskin (професор по математика и економија на Харвард) и Kamer Daron Acemoğlu (професор по економија на МИТ). IEO е една од 15-те официјално признати меѓународни научни олимпијади.
Оваа година, под македонското знаме во Кина ќе се натпреваруваат:
1. Стефан Младеновски – СОУ „Јосиф Јосифовски“, Гевгелија
2. Теа Ангелова – Меѓународно училиште „НОВА“, Скопје
3. Оливера Џамбазова – СУГС „Орце Николов“, Скопје
4. Георги Јаковлев – ПСУ „Јахја Кемал“, Струга
5. Ванеса Томова – ПСУ „Јахја Кемал“, Скопје
Националното првенство за селекција на македонските кандидати за Меѓународната економска Олимпијада, односно Четвртата Македонска економска олимпијада (МЕО) се одржа на 30.04.2026 година, во просториите на Природно-математичкиот факултет во Скопје, во организација на Сојузот на математичари на Македонија (СММ), како единствено акредитирано научно здружение за организирање на овој натпревар.
Најдобрите ученици од првата селекција се пласираа во финалниот дел, каде ги одмерија знаењата од областа на економија, финансии, бизнис, како и примената на логичкото размислување и математичко-статистичките методи.
Покрај златниот медал на Стефан, значаен успех постигна и ученикот Јован Оџаков (IV година) при СОУ „Јосиф Јосифовски“ Гевгелија, кој освои сребрен медал под менторство на Русица Атанасова и Софија Тошева-Раманчева. На државното првенство учествуваа и гевгелиските ученици Дарко Ѓоргиев, Тони Танов (ментори Сашо Папалазов и Снежана Кичукова) и Трајче Панев (ментори Русица Атанасова и Софија Тошева-Раманчева), кои успешно ја поминаа првата селекција.
Честитки за нашиот гевгелиски Олимпиец по економија и посакуваме многу успех, среќа и медал за Македонија!
Средношколецот Стефан Младеновски од Гевгелија Економски Олимпиец
Стефан Младеновски – Двократен Државен ПРВАК по Економска Олимпијада 2025 и 2026
