Единицата на територијалната противпожарна заштита во Гевгелија во текот на периодот јануари – мај 2026 година извршила 77 интервенции, а до 5 јуни уште 2, или вкупно 79 теренски акции во текот на изминатите 156 денови од годината.
Тоа значи дека во просек нашите пожарникари од ТППЕ Гевгелија интервенирале на повик на не цели два дена, статистички гледано на 1,97 денови, или пред да заврши вториот ден. Односно, еден ден интервенираат, вториот ден ја подготвуваат опремата за повторна интервенција и следниот неполн ден пак се на терен. Ова е големо оптеретување на единицата на ТППЕ Гевгелија, особено со фактот што доаѓаат потопли денови, присуството на отворено е почесто, работите надвор се актуелни, во поле, во нива и опасностите од пожар демнат ако не се внимава при употреба на електрични алати, или машини кои испуштаат искри.
Најголем број на интервенции на кои учествувале гевгелиските пожарникари во изминатиот период се технички 25, потоа интервенциите на пожари на отворен простор 24, интервенциите на опожарени објекти (запалени оџаци, стан, балкон, штала на земјоделски имот) вкупно 21, па следуваат интервенциите при сообраќајни несреќи, интервенции на заплени патнички и товарни моторни возила.
Во првите два дена од јуни ТППЕ Гевгелија интервенирала во гаснење на пожар настанат во штала на земјоделски имот во с.Негорци. Пријавата е доставена до ТППЕ Гевгелија на 1.06. во 18:53 часот и се излегло веднаш на терен. Се интервенирало со 2 противпожарни возила и 6 пожарникари. Пожарот е изгаснат.
Следниот ден на 2 јуни, во 09:40 часот пристигнала дојава за настанат пожар на отворен простор во полето во атарот на с.Негорци. Од ТППЕ Гевгелија се упатиле на терен едно ПП возило и двајца пожарникари. Пожарот е изгаснат, но пред да биде ликвидиран пожарот опустошил простор од 50 декари.
Значи, и пред да настапи летото, опасностите од пожари демнат. Имајќи предвид дека претстои период со зголемен ризик од појава на пожари, потребно е подигнување на јавната свест кај граѓаните за внимателно однесување во текот на летниот период.
Од ТППЕ Гевгелија апелираат до сите граѓани да бидат особено внимателни и одговорни, а доколку забележат оган или чад веднаш да се јават да пријават пожар на специјанѓлниот број 193, или да ги известат надлежните служби преку бројот за итни повици 112.
Навременото пријавување и брзата реакција се од клучно значење за спречување на поголеми штети и заштита на луѓето, имотот и природните богатства.
Да потсетиме, минатата 2025 година гевгелиските пожарникари извеле 187 интервенции во текот на целата година. Тоа во просек значи дека интервенирале секој 1,95 ден. Ваквиот просек укажува дека единицата на ТППЕ е секогаш на готовс да излезе на терен, да се впушти во коштец со огнот, да спаси човечки живот, да интервенира при сообраќајни несреќи. Секогаш се спремни да се впуштат да ризикуваат во пресрет на огнот за да се спаси живот, јавен или приватен имот.
Виден доказ за нивната приправност е и единствениот ден кој го имат за колективно славење Меѓународниот ден на пожарникарите 20 мај, тие го поминаа во работни одела, со полни ПП возила вода и опрема, спремни да тргнат на интервенција во секое време дури и кога имаат гости донатори од УНДП.
Такви се пожарникарите – Секогаш на нозе, секогаш во служба на граѓаните. За ваквата посветеност Ви благодариме. За човечноста Ви се поклонуваме. Нека Ве следат здравје, сила и што помалку интервенции!
