Денеска, 16 јули 2026 година по децении риболовен стаж му се посреќи на стојачанецот Иван Стамков – тој улови СОМ КАПИТАЛЕЦ тежок 40 килограми, долг 182 сантиметри.
Големиот „мустаклија“ бил „станар“ во водите на локалната брана кај с.Селемлија, богданско, а денеска утрово ја стекна титулата најголем улов на рибарот Иван. Но, пред да биде фотографиран како рекорден улов и трофеј на Иван, пружил 20 минутен отпор не сакајќи да го напушти своето живеалиште, водите на брана Селемлија.
Риболовецот Иван вели дека и порано имал ловено примероци риба над 10-на килограми, но овој сом капиталец му е најголем улов во рибарската кариера.
Во напорот да се извади силната разгневена риба од водите на Иван му помогнале рибарите-другари: Никола Донев, Цветан Донев и Трајче Коцев, сите членови на Здружението за спортски риболов „Стојаково“.
Го прашавме Иван дали има своја мајсторија во ловењето риба, па ќе сака ли да открие на што го улови овој капиталец.
– „Ловам често, често фаќам поголеми примероци, како вчера на пример, пак уловив сом со тежина од 15 килограми и должина од 80 сантиметри, повторно овде на брана Селемлија. Користам инаку природни мамки, скакулци“.
Ги забележавте деновиве големите скакулци како летаат по зеленилото низ дворовите? Е, тој крилест летач е деликатесот на кој се намамил големиот сом во водите на селемлијска брана. Вечерва тој самиот ќе биде деликатес за друштвото рибари од Стојаково.
Честитки за Иван за рекордниот улов!
Наздравје нека е прославата во редовите на Здружението за спортски риболов од Стојаково кое брои околу 40-на млади риболовци, па следниот пат да им се посреќи.
БИСТРО!
Иван својата мајсторија ја носи со себе, знае да улови поголем примерок риба од други риболовни зони. Еве примероци уловен дојрански крап.
Да се извади ваков убавец на суво, со вратоломии, скокови, мавање со опашката и тегнење на рибарскиот конец за да се ослободи, сигурно не е лесно. Но рибарските мајстори на занаетот кога еднаш ќе ја научат вистинската мамка, точното време на хранење на рибата, места на движење, наоружани со часови трпение, тогаш исходот е познат – за ручек ќе има риба!
Ова е пејсажот, видливото и невидливо за око подводно природно богатство на браната кај с.Селемлија.
Честитки за Здружението за спортски риболов од Стојаково на вредните членови посветени на спортот и рибарската традиција. БИСТРО!
