Да си налетување во Дојран и да доживееш бесплатен музички концерт со балканска ѕвезда како што е Сергеј Четковиќ е привилегија на летувалците, но и задоволство за дојранчани, ретка прилика за околните гости и посетители како што беше синоќа на концертот во Градскиот парк во Стар Дојран.
На 8 август, во прекрасниот амбиент покрај Дојранското Езеро, бројната публика имаше можност да ужива во вечер исполнета со неговите најпознати песни, препознатливи балади и моќниот вокал на еден од најомилените регионални музички уметници.
Сергеј Четковиќ на концерт во Дојран, ја обои ноќта во романтични светки од срцата на публиката која се спои со акордите на неговите хитови.
Цел Дојран пулсираше со романтика долж Дојранското крајбрежје, зошто таму каде што е езетото, таму е ехото на убавината.
Прекрасна летна концертна ноќ!
Со својата харизма и емотивната интерпретација, Четковиќ уште од првите минути ја освои публиката. Неговите добро познати хитови ги потсетија присутните на најубавите љубовни приказни, а публиката заедно со него ги пееше стиховите на песните што со години се дел од регионалната музичка сцена.
Посебната атмосфера ја создаде и самата локација. Дојранското Езеро, летната ноќ и музиката во живо се покажаа како совршена комбинација за концерт кој долго ќе остане во сеќавањето на присутните.
Со концертот на Сергеј Четковиќ, Дојран уште еднаш покажа дека и во летната сезона може да понуди атрактивна музичка програма и настани кои привлекуваат публика од различни генерации. Ваквите концерти не се само забава за локалното население – тие го збогатуваат туристичкиот живот, привлекуваат гости од целата земја и создаваат позитивна слика за Дојран како атрактивна летна дестинација.
Вечер покрај езерото, големи хитови и илјадници насмеани лица – концертот на Сергеј Четковиќ во Дојран дефинитивно беше музичка вечер за паметење.
