Македонското знаме и Гевгелија се искачија на победничкиот подиум во Сараево! На штотуку завршениот престижен меѓународен натпревар за спа, велнес и физиотерапија, македонските претставници постигнаа историски резултат во исклучително силна конкуренција.
Посебен успех забележа Митко Иванов, кој во конкуренција од вкупно 140 учесници од целиот регион, успеа да го освои високото второ место. Заедно со него, достоинствено и професионално Македонија ја претставуваше и Васил Бабулов. Двајцата натпреварувачи, иако по потекло од Струмица, се горди ученици на едукативниот центар на Спа и Велнес Асоцијацијата на Македонија (СВАМ) со седиште во Гевгелија.
Под будното око и менторство на претседателот на СВАМ и официјален судија на натпреварот, Александар Мендов, нашите претставници покажаа техничка прецизност и етика кои беа наградени од меѓународното жири на Светската федерација за масажа.
- „Горд сум на Митко и Васил. Ова второ место е потврда за квалитетот на обуките што ги спроведуваме во Гевгелија. Да се биде во самиот врв меѓу 140 професионалци е доказ дека нашиот едукативен систем е на светско ниво“ – изјави за GevgelijaNet судијата Александар Мендов, кој воедно е претседател на Спа и Велнес Асоцијацијата на Македонија (СВАМ).
Тој изрази благодарност до Општина Гевгелија, која ја препозна важноста на овој настан и овозможи овие млади професионалци да ја претстават нашата општина и држава на меѓународната сцена.
Мемов меѓународниот успех на македонскиот учесник го оцени како мотив плус за Гевгелија да се етаблира како регионален центар за врвна спа, велнес и физио едукација.
Настанот се одржа под покровителство од Светската федерација за масажа (World Massage Federation) и Здружението на физиотерапевти, фризери и козметичари „СИНЕРГИЈА“ на 23 и 24 април во Сараево, Босна и Херцеговина.
Стручното меѓународно жири високите оценки ги доделува за извонредната техничка изведба, ергономијата на терапевтот, професионалниот однос, хигиената, перформанс, познавање и целокупниот пристап кон клиентот. Нашиот награден натпреварувач покажа спој на медицинско знаење и врвна велнес услуга.
Ете за таква велнес услуга се учи во Гевгелија, а се победува во Светот!
