Медицински тим составен од лекар и медицинска сестра од утре, сабота, 29.07.2023 година ќе започне со работа во 12 часовни смени во општата Амбуланта во Стар Дојран.
Ова денеска го објави градоначалникот на општина Дојран Анго Ангов по донесената одлука од страна на Советот на општина Дојран за обезбедување на медицински кадар во ова туристичко место во државата, во соработка со здравствени установи од Валандово, Гевгелија и Струмица.
– „Освен дневните смени по 12 часа, на граѓаните ќе им биде достапна здравствена помош и после завршувањето на смената од 12 часа, на начин што медицински тим ќе биде достапен на повик во секое време за граѓаните кои ќе имаат потреба од итна медицинска нега“ – изјави градоначалникот Ангов.
За мобилност на тимот составен од лекар и медицинска сестра ќе се стави во функција санитетското возило во сопственот на општина Дојран кој веќе речиси две години беше надвор од функција паркиран во дворот на Амбулантата во Стар Дојран.
– „Согласно денешната одлука на Советот на општина Дојран, возилото за итна медицинска помош останува во сопственост на Општина Дојран, но истото се дава на користење на ЈЗУ Здравствен дом Валандово со цел да се користи за потребите на жителите од општина Дојран, посетителите и туристите кои имаат потреба од ваков тип на услуга“ – ја образложува Ангов одлуката на дојранските членови на локалната самоуправа.
Возилото ќе се користи и надвор од летната туристичка сезона, односно во текот на целата календарска година, така што граѓаните ќе може да добиваат бесплатни здравствени услуги, на терет на Министерството за здравство..
Возилото ќе се користи и за вршење бесплатни здравствени прегледи во локалните места за целото локално население во Дојран, одредени денови од неделата, во текот на целата календарска година, се’ со цел да се намалат трошоците на социјално ранливите категории на лица и старите и изнемоштени лица кои не се во можност да ги извршуваат истите во здравствените установи.
Санитетското возилото за кое зборува Градоначалникот е донирано од Министерството за здравство за подобрување на здравствените потреби на општина Дојран во јуни 2021 година, лично од тогашниот министер за здравство Венко Филипче. Истото возило со одлуката на Советот на општина Дојран останува во сопственост на општина Дојран, но се отстапува на користење на Здравен дом Валандово, зошто оваа јавна здравствена установа се нафати да распореди медицински тим за покривање на потребите на општина Дојран за време на летната туристичка сезона, но и во текот на целата година.
Сите трошоци за работа на Амбулантата во Стар Дојран, оперативни, медицински реквизити и потрошен материјал, плата за тимот, режиски трошоци паѓаат на Терен на Министерството за здравство.
Дојранчани и посетителите добиваат здравствена помош од овој викенд.
