Обилните врнежи во текот на вчерашниот ден предизвикаа излевање на локалните реки во струмичко и полави на нивите, пластениците, бачилата.
Поради излевањето на реката Тркања кај селата Сачево и Муртино поплавени се поголеми површини земјоделско земјиште, пластеници, како и дворови на куќи во с. Муртино.
Пријавено е дека надојдените води од реката Тркања кај месноста Шепово однеле 120 овци и 100 јагниња, сопственост на жител од с. Костурино. Eве како изгледа шталата на сточарот од Костурино кој останал без своето стадо:
Во текот на денот ангажирани се 5 булдожери, 5 камиони со песок и 1 багер за интервенција на критичните локации. Исто и локалните земјоделци самоте со механизација ги расчистуваат наносите од своите ниви.
Според информациите од ЕЛС Струмица, состојбата е стабилизирана и се бележи опаѓање на водостојот на реките Струмица и Тркања, иако на одделни места сè уште има појава на заезерување.
Во струмичкиот регион забележан е зголемен водостој на реката Плаваја во с. Подареш. Екипи на ЕЛС Радовиш и ЈП „Плаваја“ извршиле санација и состојбата е ставена под контрола, без опасност од излевање.
Во другите региони од државата нема опасност од излевање на реките.
Има зголемен водостој Крива Река во Крива Паланка од наврнатите 33 литри дожд за 12 часа во текот на денот. Во Штип пријавен е срушен потпорен ѕид на улицата „Љубен Иванов“, при што се оштетени две паркирани возила и е блокирана една сообраќајна лента, јавува ЦУК.
