Агенцијата за храна и ветеринарство (АХВ) спречи увоз на вкупно 50 тони небезбедна храна која требало да заврши на македонскиот пазар, по контроли спроведени на граничните премини.
Официјалните ветеринари на граничниот премин Ќафасан забраниле влез на 27 тони говедско мелено месо со потекло од Парагвај. По извршената проверка во информативниот систем на АХВ и увид во увозната документација, било утврдено дека месото потекнува од објект кој не е одобрен од Агенцијата, со што не се исполнети основните безбедносни стандарди за увоз.
Од АХВ посочуваат дека ваквите неправилности отвораат сомнеж за здравствената исправност на производот и претставуваат потенцијален ризик за потрошувачите, поради што е донесена одлука за забрана за негово пласирање на пазарот.
Покрај ова, инспекторите за храна минатата недела спречиле и увоз на пратка од 22 тони ореви од Казахстан. Причина за забраната биле несоодветно означување и отстапки од пропишаните критериуми за квалитет и безбедност. Целата количина е вратена во земјата на потекло.
Од Агенцијата најавуваат дека контролите ќе продолжат со засилено темпо, со цел да се спречи внесување на небезбедни производи во земјата.
– „Апелираме до увозниците строго да ги почитуваат законските регулативи и стандардите, бидејќи здравјето на граѓаните останува врвен приоритет“, порачуваат од АХВ.
