Oбилните врнежи од дожд најавени од УХМР беа најизразени на југот од државата.
За два сантиметра се зголеми водостојот на Дојранското, а исто толку покачување на водостојот бележи и Преспанското Езеро, додека нивото на Охридското Езеро е повисоко за еден снатиметар во споредба со вчера, покажуваат резултатите од последните мерења направени од Управата за хидрометеоролошки работи (УХМР).
Со тоа водостојот на Дојранското Езеро е за 54 сантиметри повисок од просекот за октомври, додека нивоата на другите две природни езера во земјава се пониски од просечните и тоа за 2,72 метра кај Преспанското и за 11 сантиметри кај Охридското Езеро.
Во моментот нивото на Дојранското езеро е 6 сантиметри над „0“ котата.
– „Езерото е разбранувано поради силниот северен ветер, кога ќе се смири езерската површина можеби покачувањето и да е поголемо од 2 сантимерти“, вели метеоролошкиот работник Злате Талески од Дојран.
Ваквиот пораст е резултат на последните врнежи на 2 и 3 октомври. Вчера од 15 часот до ноќта наврнаа 15 литри дожд на 1 метар квадратен. Денеска од почетокот на денот до 15 часот измерени се уште 30 литри воден талог на 1 м2. Се’ вкупно дојранското езеро се „нагости“ со нови 45 литри дождовен талог на 1 м2, што е корисно за езерото.
Зголемување на водостојот во споредба со вчера имаат и сите реки во земјава. Нивните нивоа најчесто се пониски или во рамките на просекот за октомври.
